A integración e adopción destas tecnoloxías facilitadoras na industria biotecnolóxica e de tecnoloxías médicas é onde radica o gran potencial de conseguir unha medicina personalizada ou de precisión que estableza, para cada individuo (ou grupo de individuos estratificados), ferramentas para a prevención segundo a súa predisposición a determinadas enfermidades, sistemas para o diagnóstico precoz, e métodos para elixir a estratexia terapéutica que mellor se adapte a cada persoa en cada circunstancia.

Con todo, unicamente cun enfoque integrador que considere a gran complexidade das patoloxías humanas conseguiremos dar resposta aos retos máis importantes en saúde ao que nos enfrontamos: o cancro, as enfermidades asociadas ao proceso de envellecemento (neurodexenerativas, crónicas), as enfermidades minoritarias e as enfermidades infecciosas. Xa que logo, esta abordaxe integradora é esencial para garantir o éxito dos tratamentos, minimizando os efectos non desexados.